Undir lok 16. aldar og á þeirri 17. gerðu nokkrir Íslendingar kort af norðanverðu Atlantshafi og löndunum í kring. Þeir freistuðu þess að samræma fornar íslenskar frásagnir um landaskipan á þessum slóðum við kort þau er þá voru í mestu gengi eða menn höfðu við höndina. Kortin voru í það smáum mælikvarða að erfitt var að gera Íslandi viðhlítandi skil enda var gerð þess í rauninni aukaatriði. Fyrir kortagerðarmönnunum vakti að gera grein fyrir siglingum Íslendinga vestur um haf til Grænlands og Ameríku. Gerð þeirra flestra stóð sennilega í sambandi við fyrirætlanir Danakonunga um að ná að nýju tangarhaldi á Grænlandi. Kort þessi eru í rauninni frekar hluti af kortasögu Grænlands en Íslands.
Af öllum kortunum eru til nokkrar mismunandi eftirmyndir en tvö þeirra eru ekki lengur til í frumgerð.
Meðan á dvöl Þórðar Þorlákssonar, síðar biskups í Skálholti, stóð í Kaupmannahöfn árið 1668 tók hann saman rit um Grænland. Það var aldrei prentað en hafði að geyma fimm landabréf, þ. á m. þetta en hér birtist töluvert breytt eftirmynd af því úr bók Þormóðar Torfasonar Gronlandia antiqva. Gerð Íslands svipar til sérkorta þeirra sem Þórður gerði af landinu sama ár. Nöfn eru allmörg miðað við stærð kortsins. Suður fyrir landinu er Spanske Eiland sem Baskar töldu sig hafa fundið fyrr á öldinni.