Kortið spannar Seltjarnarnes inn að Laugarnesi og Kollafjörð yfir á Kjalarnestanga með eyjunum Örfirisey, Akurey, Engey, Viðey og Lundey. Einnig eru sýnd Tjörnin, kirkjan og Víkurbærinn og mörg önnur býli eru nafngreind. Á kortinu má sjá byggðina á Seltjarnarnesi eins og hún var áður en mönnum kom til hugar að byggja borg í kvosinni við Reykjavíkurtjörn og meðan byggingar einokunarverslunarinnar voru enn úti í Örfirisey. Kortið er þannig gert að suður snýr upp sem ekki var einsdæmi um þær mundir. Þetta er elsta kort af Reykjavík sem vitað er um.
Neðst á kortinu er stutt kvæði og skipið er líklega, Den Svenske falken, sænskt skip sem Danir hertóku 1715. Tjúgufáninn sýnir að skipið er vopnað en vopnuð skip fylgdu kaupförum til Íslands.
Hans Hoffgaard (f. 1678), sem var skipstjóri á Íslandsförum, gerði Íslandskort og kort af tuttugu höfnum. Talið er að hann hafi að lokum farist í hafi með skipi sínu og var Galdra-Imbu kennt um.
Frummyndin er á Konunglega bókasafninu í Kaupmannahöfn en nákvæm eftirgerð er af henni frá 1926. Einnig smækkuð eftirmynd frá 1749.