Á 16. öld voru gefnar út margar eyjalýsingar á Ítalíu. Árið 1572 kom út í Feneyjum ein slík, L'Isole piu famose del Mondo, eftir Thomaso Porcacchi. Í bókinni er kort af Íslandi, gert af Girolamo Porro. Kortið, sem er prentað eftir eirstungu, er vel dregið enda var Porro kunnur kortagerðarmaður. Fyrirmyndin hefur, eins og hjá mörgum öðrum kortagerðarmönnum, að mestu leyti verið sótt til Norðurlandakorts Olaus Magnus. Nokkrar lagfæringar hafa verið gerðar, t. a. m. hafa Hólar verið færðir á réttan stað norðan fjalla. Það mótar nokkuð svip kortsins að ýmsir efnisþættir hafa verið sóttir til Zeno-kortsins, þ. á m. hinar sjö nafngreindu eyjar við austurströndina.
Árið 1713 var kortið endurprentað í kortasafni Raffaelo Savanarola, Universus terrarum orbis, og er það kort úr þeirri útgáfu sem sýnt er hér.